O pasado 2 de abril celebrouse en Verín (Ourense) a xornada «Do dereito ao teito hai moito treito», organizada por COCEDER co obxectivo de analizar os desafíos actuais e buscar solucións viables para a problemática da vivenda no medio rural. A actividade tivo lugar no salón de actos da Casa da Cultura e contou coa participación de centros de desenvolvemento rural de todo o Estado, ademais de persoas expertas procedentes de diversos ámbitos.
Entre as intervencións destacadas estivo a do noso compañeiro Plácido Lizancos, profesor da Escola Técnica Superior de Arquitectura da Universidade da Coruña, quen presentou a ponencia «Rehabi(li)tar o rural». Na súa intervención, Lizancos abordou a necesidade de repensar as políticas de rehabilitación e habitabilidade dende unha perspectiva territorial, poñendo o foco na potencialidade transformadora da arquitectura como ferramenta de rexeneración rural.
A xornada contou tamén con achegas de Ana Pardo (EAPN Galicia e Provivienda), sobre a precariedade habitacional, e Mª José Piñeira (Universidade de Santiago), quen analizou o impacto das zonas tensionadas no territorio. A sesión completouse cunha mesa redonda onde se compartiron experiencias inspiradoras de xestión da vivenda rural en territorios como Teruel, Zaragoza ou Valencia.
Esta xornada formou parte do programa de sensibilización promovido por COCEDER e financiado polo Ministerio de Dereitos Sociais, Consumo e Axenda 2030, co apoio do 0,7% do IRPF e proxectos piloto sobre vivenda rural ligados aos obxectivos de desenvolvemento sostible.
